Subscribe News Feed Subscribe Comments

فطاير الجبنه

المقادير :
⅓ كوب زيت 
⅓ كوب سكر باودر 
⅓ كوب حليب بودر 
١ كوب ماء
١ علبة زبادي ( استخدم المراعي )
١ م ك خميره فوريه ( ملعقه معياريه ١٥ مل )
١ م ك باكينغ باودر ( ملعقه معياريه ١٥ مل )
٣ اكواب دقيق ( استخدمت دقيق فوم )
الطريقه :
قبل ماآبدأ بشرح الطريقه برجع اقول ان كل وصفه من وصفات المعجنات 
قد تختلف المقادير بنسب بسيطه ويرجع ذالك لاختلاف نوعية الدقيق 
والمواد الممزوجه معاها والمكونه له
يعني ممكن نحتاج مويه اقل او أكثر وكذالك دقيق اقل او أكثر
حسب النوع المستخدم
يعني ماتجي وحده تقول العجينه فاشله برجع اقولها ان العجينه هذي افضل عجينه 
استخدمتها بحياتي من شدة طراوتها تجلس الى ثلاثة ايام طازجه
ومافي احد يجربها الا وتعجبه ويستمر عليها كل مافي الموضوع انه لازم تضبطين المقادير 
وتعرفين الموازنه بين الماء والدقيق كيف وانا هنا بينت لكم نوع الدقيق والزبادي
علشان اللي حاب يمشي ع المقادير وتكون اكيد تمام معاه
،،،،،،،،،،،،،،،،،،،،،،،،،
نضع الان الماء والزبادي والحليب والسكر والزيت والباكينغ باودر والخميره 
وتخلط مع بعض نبدأ الان باضافه الدقيق والعجن 
ولو استخدمتي نوع مختلف من الدقيق 
قد نحتاج الي مقدار اقل من الثلاثة اكواب 
ممكن نستخدم كاسين وثلاثة ارباع 
حتى في دقيق فوم ممكن لاكن راح تكون العجينه لينه نوع ما 
نستمر بالعجن لمدة ٥ دقائق والعجينه هذي شديده اللزوجه بسبب الزبادي 
لاكن مافيه مشكله ممكن تدهنين اليد بالزيت اثناء العجن 
ثم تغلف باحكام وتترك تخمر لمدة ٤٥ دقيقه 
ثم  نعاود العجن مره اخرى ونقوم بتكوير العجينه قطع صغيره 
وتغطى وتترك لمدة ٢٠ دقيقه ثم تفرد كل قطعه بشكل دائري 
وتحشى بالجبنه ممكن نستخدم طريقه لف الصامولي
في الموضوع هذا 
ترص بالصينيه بحيث نترك مقدار سنتمير واحد بين كل فطيره واخرى 
وتغطى بفوطه وتترك لمدة ٢٥ دقيقه
  مهم جداً ترك الفطاير تتخمر بعد تشكيلها
ثم تدخل الفرن على نار متوسطه
لمدة تتراوح بين ٧ دقائق وعشر 
الملاحظ في العجينه هذي انها سريعة التحمير 
ويتضاعف الحجم فيها بشكل كبير 
وهذا اللي يخلي العجينه طريه جداً
ممكن تزينيها بالسمسم مثل الصوره هذي
حشيتها جبنه ودهنت الوجه زيت ورشيت سمسم عليه

وممكن تستخدمين العجينه لاشكال اخرى من المعجنات والحشوات  
 وبالعافيه ،،




22 التعليقات:

غير معرف يقول...

اهلا غلا عندي سؤال محيرني وهو في مجال الطبخ أتمني الرد عليه ، انا عندي مشكله في اي شي محشي مثل الكيكه او البسبوسه وخاصه المحشيه تطلع معي الجزء الي بالوسط عجين وما نضج زين وش السر مع اني اقوم بالطريقه بحذافيرها يا ليت اجد عندك أجابه شافيه وانا لك شاكره

غير معرف يقول...

تتوقعين من الفرن مع اني أحطه بالوسط ودرجه الحراره ١٨٠ واسخنه قبل خمس دقائق

غالا يقول...

اذا كانت الكيكه او البسبوسه تكون محمره زياده من تحت
والوسط غير مستوي هذا اكيد من حرارة الفرن تكون عاليه
من غير ماتكون موزعه بشكل مناسب في الفرن كله
فيتحمر اللي تحت من غير مايسمح للوسط بالنضوج
وبالنسبه للدرجة الحرارة احياناً نضطر مانتقيد فيها
لان الافران مش كلها موزونه حرارتها مثل بعض لان الجوده مختلفه من شركه لاخرى
يعني انا احياناً اعمل كيكه بفرن عندي على ١٤٠ درجه فقط لانه حرارته عاليه
وفي الفرن الثاني اخليها ١٩٠ وازيد احياناً ويادوب توصل للحراره المطلوبه
ايضاً فيه افران تكتم الحراره وتسمح بتوزيع الحراره بالشكل المطلوب
وافران أخرى تكون اقل مستوى وماتوزع الحراره بشكل جيد
المطلوب منك تشغلين الفرن قبل بعشر دقائق وشبك الفرن خليه بالوسط
ولاتفتحين باب الفرن كل شوي وحاولي تعرفين مقياس مناسب للحراره
احتمال ١٨٠ درجه غير مناسبه لنوعية فرنك ،،

غير معرف يقول...

مشكوره يعطيك العافيه

غالا يقول...

يعافيك ربي ياحلوه ،،

monaphoto يقول...

جربتها أمس وتجنن صراحه كل أهلي انهبلوا عليها حتى أمي تقول خلاص بنعتمدها للفطاير
من جد لذيذه وهشه وخفيفه
قلت لازم اعلق واشكرررك من قلب

غالا يقول...

عليكم بالعافيه
وتسلمين ع التعليق الحلو ،،

غير معرف يقول...

حبيبتي اقدر استخدمها للفطائر الملونه

غالا يقول...

قصدك تضيفين للعجينه لون .. طبعاً ممكن لو حابه تلونينها ،،

غير معرف يقول...

يسلمووو .. بس عندي سؤال ع درجة حرارة الحليب و الزبادي عادي تطلعها من الثلاجة و استخدمها؟ و الموية عادية او تكون دافية؟

غالا يقول...

الله يسلمك
الحليب المستخدم هنا حليب باودر
والمويه والزبادي خليه قريب من درجة حرارة الغرفه
احياناً اطلع الزبادي من الثلاجه واقلب فيه لغاية ماتخف البروده واستخدمه ،،

غير معرف يقول...

مشكووووره راح اعتمدها برمضان ان شاء الله

غالا يقول...

راح تعجبك ان شاء الله بالتوفيق ،،

Unknown يقول...

يسلموووووووو يعطيك الف عافيه ..

غير معرف يقول...

رااااااائعة انتي يا غالا
ودي آخذ كورس عملي عندك إذا تكرمتي
صح عليك دقيق الفوم حلو في العجاين بس يبيله يد تعجن مضبوط لأنه هش ، تطلع الفطاير زي حقت المخابز الراقية خخخخخخخ
اممممم وصفاتك حلوة وملاحظاتك تبين انك بروفيشنال كتشن ، واكلك كله تيست قود مؤ اي اي
اهنيكِ صراحة ماشالله لا قوة إلا بالله استفدت منك كثيييير شكرا لك

غير معرف يقول...

حلوه واييييييييد امممممممم يوعانه

فوفو يقول...

العجينه روعه انا مجربته من قبل .....الله يعطيك العافيه

غالا يقول...

مشكورين جميعاً
واستفادتكم هو الهدف من وجود المدونه ،،

Unknown يقول...

يعطيك العافيه غالا
كلك على بعضك حلوه
إطباقك شهيه وتقديمك لها من خلال الصور جداً رائع
اشكرك

غير معرف يقول...

من جد روووووعه قليله عليييها

غير معرف يقول...

حبيبتي غالا وين أجد دقيق فوم
يسللللللمو على المدونه فيها أشييييياء كثير عجبتني ....
تسلم أيادييييييك

غالا يقول...

مو من الضروري تتقيدين بدقيق فوم ..
عموماً لو انتي من السعوديه تلاقين دقيق فوم في الغالب عند ماركت العثيم
وفي المستودعات ..

Related Posts Plugin for WordPress, Blogger...
 
Crazy Cooking | TNB